Disse kreet herinnert ons aan de Die:mse kermisse waor dah liedje duk wier gespöld. Volges mien deur ’t orkes Kaliber. Mor ’t slut ok op ut genuumde veurval en dah spölde zich af op 4 oktober – Wereld Dierendag geliek met de 1e maond van ut letste kwartaal – vandaor onze keus.
In die tied hawwe bi-j ons in de buurt een boer den rondging met de beer, een zekere Toon S. Toen ware d’r nog völ kleine bedrie:fkes met een paar melkbeeste, un stuk of wah zeuge (fokverkus) en een trop tuute. De bereholder den dan rondging met de beer spoj allejekes van de pruum. Hi-j hah altied van die grote gezinspakke Kentucky pruumtabak bi-j zich en hi-j hah verschrikkeluk goe:d beremateriaal, wied en zied ston hi-j daorum bekend.
Hi-j hah een afgekeurde politiebus umgebouwd tot veewagen en d’r konne twee dekbere achterin, gescheije van mekaar anders geet dah jao nie goe:d.
Met den politiebus was hi-j in onderhold bi-j de garage van Jo Janse en Jan Raobe naeve de boerderi-j van Geert en Mia Janse in de lange Hèègh. Moeder Janse zag de bewuste bere-auto op d’n vierde oktober bi-j de garage staon en Toon S. was druk in aoverleg met de garageholders aover ’t onderhold. Ze bedach zich gin moment en grep een lang oranje lint (die hah ze d’r al extra veur gemaak), deej de achterklep van de bere-auto los en probeerde gauw ’t lint um de beer te knuppe, dit ter ere van dieredag. Ze haopte dah de beer zol blieve staon, mor den kende ut ritueel en was zich al een bitje an ut opwerme um een mooi slank geltje (dah is een vröwkesverke die nog nooit bigge heh gehad) of een knappe jonge zeug te verleide en te versiere.
Dus den beer de kar uut, de neus umhoog met opgetrokke lippe, de stat in de loch, ’t boortje (dit is ’t geslachtsapparaat van de beer) fier veuruut en dah achter Marie aan in de haop dah ze een of andere deur los zol trekke met daorachter natuurlijk de ‘Blind Date’ veur de beer. Mor Marie wis zich gin raod um in huus te komme en de beer bleef smachtend achter ’t huus staon en Toon en de jonges van de garage krege met völ moeite de beer weer in de politie-berekar.
Waor gebeurd, de Jansens ware jaorelang onze fijne buren.
Henk Gieling
